சாயல்குடியில் போக்குவரத்து பணிமனை செயல்பாட்டுக்கு வர பொதுமக்கள் கோரிக்கை…!

ராமநாதபுரம் மாவட்டம் சாயல்குடியில் அமைச்சர் ராஜகண்ணப்பன் அடிக்கல் நாட்டிய திட்டம் நான்கு ஆண்டுகளாகியும் கிணற்றில் போட்ட கல்லாக அப்படியே கிடக்கிறது.
சாயல்குடி பேரூராட்சி பஸ் ஸ்டாண்ட் அருகே அரசு ஆரம்ப சுகாதார நிலையத்திற்கு செல்லும் வழியில் போக்குவரத்து பணிமனை அமைப்பதற்காக இடம் ஒதுக்கீடு செய்யப்பட்டுள்ளது.
2021ல் அப்போது முதுகுளத்தூர் சட்டமன்றதொகுதி உறுப்பினராகவும் போக்குவரத்துத் துறை அமைச்சராக இருந்த ராஜகண்ணப்பன் போக்குவரத்து பணிமனைக்காக அந்த இடத்தில் அடிக்கல் நாட்டு விழா நடத்தினார்.
இந்நிலையில் அரசு ஒதுக்கீடு செய்த போக்குவரத்து பணிமனைக்கான இடம் எவ்வித பயன்பாடின்றி திட்டம் முடங்கிய நிலையில் உள்ளது. அந்த இடத்தில் சீமைக் கருவேல மரங்கள் வளர்ந்தும் இறைச்சி கழிவுகள் கொட்டும் இடமாகவும் மாறியுள்ளது.
போக்குவரத்து பணிமனை அமைப்பதற்கு உரிய நடவடிக்கை எடுக்க வேண்டும் என இந்த பகுதி பொதுமக்கள் கோரிக்கை விடுத்துள்ளனர்.
கடலாடி, சாயல்குடி உள்ளிட்ட சுற்றுவட்டார பகுதி கிராமங்களுக்கு செல்லும் அரசு டவுன் பஸ்கள் மற்றும் புறநகர் பஸ்கள் வந்து செல்வதற்கு ஏற்ற வகையில் கும்பகோணம் அரசு போக்குவரத்து கழகம் சார்பில் பயனுள்ளதாக அமையும்.
பணிமனை தொடர்பாக சென்னை சென்ற சாயல்குடி பேரூராட்சி தலைவர் மாரியப்பன் போக்குவரத்து துறை அமைச்சர் சிவசங்கரை சந்தித்து பஸ் டெப்போ பணிமனைக்கான பணிகளை விரைந்து முடிக்கவேண்டும் என மனு அளித்துள்ளார். அரசு இந்த திட்டத்திற்கு தேவையான நிதியினை ஒதிக்கீடு செய்து இந்த ஆண்டுக்குள் பணிமனையினை திறந்து வைக்கவேண்டும் என சமூகஆர்வலர்கள் கோரிக்கை விடுத்துள்ளனர்.